Boris Kazija, Rijeka

PLACA OD BESED

munjen na svoju ruku
pokazujuć muda va rukah
poskriveć san načinel
banak na placi života
prvo nego ča se je sunce
pokazalo van....


dva šolda dajen
ki će va uho zet
ča mi spod pajoli duše
pušća
salata besed
poškropljena suzami
niman više koga mamit
svi su tu
svoj križ
niki ni pozabil
vage nimn od oka dajen
osan listi putarice svake tri ure
da zasvitlimo svi
kuntra škurega
lumin nagoren va vodi
ki oganj zema z leda
od straha za drage duše
ke su na putu da se ne vrnu
i one
ke su me kako mihirič sapunjačine
va rukah držale i čuvale
a ja san se činil kako da to
ni niš
va velomu kolu
ko se obraće baz da koga ča pita
zi svin onin ča mi ne re va glavu
tempa ura dokli dura....


grančica masline va žmuju vode
sprid kamare
va koj leži dragi čovičić
niš koristi je onaj
ki još ima ča reć
a ki će od jutra jutrin svako jutro teć
kako mrav
videt poč je kadi ča....


moru mu sada svi
stavit soli na rep
zvoni va meni ono njegovo
od let i let
prije nego ča je rekal
da će umrit morat
aš da više ne more durat
sinko moj
od vavik ti je gori
sve ista banda od vajkada
ne moreš med njimi bit
ako nećeš ž njimi jist i pit
ako siromah ča reče
će dobit
z nogun va rit....


i puno je rožic kadi on počiva
a bil je mali
brižan čovičić
neki bi rekal
kako i svi
jedan mali
na buri nakostrušeni tičić....


potle toga
neka se largaju okolo mene ća
svi oni ki svitle
ba baterije
oteć se malo igrat vele dice
da budu zgorun drugih
rožice na ploči
triba ne oteć zaradit
ditešce moje
ki će vrazima glavu
ohladit...


zovite mi jednu mrzlu pivičinu
dokli kosi zobaju grozje
i duse se
ma ne moru niš
va trsju
ko će sopeta dat
malo pravoga vina.


rabi zato na dnu žmuja
okolo trih zapolnoćun
moć videt
zagropan parangal
i čut vonj ognja suhega lovora
imat samo za sebe kračun
od koltrini neba
povonjat beli lancuni
ki se ziblju na jugu
opereni od jubavi do neba
i pronti
za još veću....


šćućuren va kantuniću
od vrimena
bojin se da me nidu kadigod
vražja kopita žbeknula va možjani
zakračunan
i zgubljenoga kračuna
od puntinića do ovdi
kako da san zapaždroćal
kolajnu svojih dnevi
koliko puti oteć škapulat
bokunić sunca na zahoju.


pa ča ako san se hitel gori kopiti
z kvintalun ušparane jubavi
moreš poć
moreš poć dimeć od mene
smilelo mi se je
da jedanput bude
kako ću ja
od vajkada
ma nikad kako sada
rozi ki te ubili
ti ne znaš, ti ne znaš
kako je kuneliću
kada mu oči pridu kako mrkaču
i va gluhoj noći
pod svićun
poteže konop
z vragun
ovo ti je moj librić od užanci
stenčica va gromači
mića potleušica, kacolić maneštrice
malo brneštrice
hitanje mićega jarića na vime života


a banak mi je spravit
i z place bižat
aš redu dva šesna čovičića
noseć okolo pasa
saki svoga pendrečića....